KULA KABICHI UJIEPUSHE NA SARATANI MBALIMBALI

Kabichi ni mboga inayopatikana maeneo maeneo mengi nchini kutokana na urahisi wa kilimo chake.  Inaliwa ikiwa mbichi au ikipikwa sanjari na vyakula vingine vya aina tofauti.

Wapo wanaopenda saladi au kachumbari yake.  Wengine wanataka iwepo kwenye kila mlo.  Wapo wakulima wanaondesha maisha yao kutokana na kilimo cha hii kutokana na kuiona fursa iliyopo.

Pamoja na matumizi yake mapana, wengi hawajui faida za kiafya za mboga hii ambayo huuzwa kwenye masoko yote; ya mabwanyenye na walalahoi na kuliwa na watu wa kada zote kwa uzito uleule.  Inapatikana sokoni mwaka mzima, si mboga ya msimu.

Tafiti zinabainisha virutubisho vinavyopatikana kwenye kabichi vina uwezo wa kuzuia saratani ya matiti, utumbo mpana na tezi dume kwa sababu huzuia viashiria vya saratani.

Mbali na viini hivyo kuzuia saratani, huimarisha ini pia.  Vitamin C inayopatikana katika majani hayo husaidia ngozi na kuboresha uwezo wa kuona huku Vitamini K iuliyopo ikiwa ni chakula cha ubongo ambao humfanya mlaji kuwa na uwezo mzuri wa kufikiri.

Pale inapotumika ipasavyo, kabichi hupunguza au kutibu kikohozi sugu na kusaidia usagaji wa chakula.  Wataalamu wa masuala ya lishe wanasema kabichi husaidia kutibu minyoo, pumu na kusafisha tumbo kwa kumsaidia mtu kuharisha.

Mboga hii huondoa lehemu kwenye damu na huzuia uwezekano wa kupata magonjwa ya moyo.  Kabichi pia ina vitamini A, B, C ambazo ni muhimu mwilini kwani husaidia kuimarisha kinga ya mwili.

Faida nyingine ni kupunguza uzito na unene kutokana na kiwango kidogo cha wanga ilichonacho.

Kabichi hupunguza tatizo la kufunga choo au choo kigumu kwani ina kambakamba zinazosaidia kukilainisha na madini ya salfa na chuma yanayosafisha tumbo.