VYAKULA VISIVYOKOBOLEWA HUIMARISHA KINGA

Kukoboa nafaka kama vile mahindi, ngano, mtama na uwele ni kuondoa sehemu ya nje ya nafaka hizo.  Sehemu hiyo ni chanzo kikubwa cha nyuzi lishe, vitamin, mafuta bora kiafya, kemikali muhimu kwa kinga ya mwanadamu zinazoitwa “antioxidants” au “phytochemicals” na aina mbalimbali za madini zikiwamo chuma, shaba, magnesium na zinc.

Kemikali za “antioxidants” au “phytochemicals” zinamchango mkubwa katika ujenzi na uimarishaji wa kinga ya mwili.

Ukoboaji wa nafaka kama mahindi na ngano hupoteza kiasi cha asilimia 50 mpaka 80 cha madini na kemikali hizo muhimu kwa kinga ya binadamu na wanyama.

Vyakula vilivyopikwa au kutengenezwa kwa kutumia unga wa dona au nafaka zisizokobolewa mtu akila zinapandisha kiwango cha sukari katika damu polepole na madhara yake ni madogo.  Ndio kusema pale tumboni chakula baada ya kumeng’enywa huingizwa katika mishipa ya damu.  Kasi ya sukari kuingia katika mishipa ya damu kutoka tumboni ni kubwa kama chanzo cha vyakula vilivyokobolewa.  Mwili wa mwanadamu huzalisha dawa ya insulin ili isaidie kuichukua sukari iliyoongezeka katika mishipa ya damu mara baada ya mtu kula chakula.

Hali hiyo inaweza kuathiri utendaji kazi wa kongosho na kusababisha mwili kuwa na mfumo wa kupima insulin hivyo kusababisha hata inapokuwa ya kutosha kwenye mfumo wa damu kazi ya kubadili sukari iliyozidi ili ipokelewe na seli, inashindikana.  Mfumo wa damu kuwa na sukari kwa muda mrefu mara kwa mara husababisha magonjwa kama kisukari, kuongezeka lehemu, shinikizo kubwa la damu, kupata uzito na unene kupita kiwango, magonjwa ya moyo, kiharusi na baadhi ya saratani.

Lakini wakati wa kuandaa, mfano mahindi ya dona yaandaliwe ili kuyafanya kuwa safi kama vile kuyapembua na kuyaosha kama kuna sulu ya kuhifadhi iondolewe kabisa.