KULA TIKITIMAJI UIMARISHE KINYWA NA MENO

Tikitimaji ni miongoni mwa matunda yanayopatikana kwa wingi nchini likiwa na virutubisho vingi vyenye faida kubwa ndani ya mwili wa mwanadamu.

Tunda hili ni chanzo cha protini, mafuta, nyuzinyuzi, wanga, calcium, phosphorus, potassium, magnesium, carotene, chuma, Vitamini A, B6 na C.

Licha ya kupatikana kwa bei nafuu, tunda hili huuzwa sehemu tofauti.  Kwenye baadhi ya maeneo hata vipande vyake vinapatikana.  Ingawa haishauriwi kula matunda yaliyomenywa, vipande vya tikitimaji huuzwa barabarani pia.

Hata hivyo, tikitimaji lina faida nyingi mwilini zinazotokana na wingi wa maji iliyonayo.  Wataalamu wanaeleza kwamba asilimia 92 ya tunda hilo ni maji.  Ni muhimu kwa afya na meno na fizi.

Linakinga uharibifu wa seli huku likisaidia uyeyushaji wa protini kuwa nishati na hurahisisha mzunguko wa damu mwilini.

Vilevile huondoa sumu mwilini na kwa mwanaume anayekula mbegu zake husaidia kuongeza nguvu za kiume.  Huimarisha kinga za mwili na kuharakisha kupona kwa vidonda na majeraha.

Tikitimaji lina kiwango kikubwa cha Iycopene kuliko matunda au mboga zozote za majani.

Wengi hula tunda bila kufahamu faida lukuki ilizonazo.  Iwe kwenye sherehe au hotelini na wakati mwingine nyumbani, tikitimaji ni rafiki wa afya.

Wengi wanaokula tunda hili hutema mbegu zake lakini zikitafunwa na kumezwa faida zake ni nyingi kwa afya ya mlaji.

Wataalamu wa masuala ya lishe wanasema mbegu za tikitimaji zina protini nyingi hivyo kuzitafuna kunaweza kumpatia mlaji chanzo cha virutubisho hivyo.  Pia, ladha yake wanailinganisha na mbegu za alizeti.

Vilevile, mafuta yaliyopo kwenye mbegu hizo hayana lehemu kwa kiwango kikubwa hivyo kutosababisha kuziba kwa mishipa ya damu hivyo kupunguza hatari ya kupata ugonjwa wa moyo na kiharusi.  Zipo mbegu nyingi za tikitimaji, ni nzuri kwa mwili wa mwanadamu.